No sé capisse più cò té parli ai tosi zovani se i xè veneti o se i xè “un fìà ritardai”, perché i té parla sempre l’italiano ciò. E dopo te vién savére che so noni viveva dentro na baraca in 35, quando che che jera ea guera. Ma parchè bisogna essare così studià se no te vòi riconòssare e tò origini.
Forse xe i genitori complessài che i crede che insegnandoghe ai fiòi solo el’italiàn i devènta pì inteijènti, invèsse i resta ancora pì bauchi, parchè i parla na engua in manco.
Eora forse quei che gà dito de insegnare el diaeto scuoea non ga sbaglià. Eà xé nà cultura e un savér che non tè insegna gnànca un corso de sopravivensa. El diaeto xè vivo e i milioni de veneti che continua parlarlo in tuto el mondo lo conferma. L’orgoglio dea to tera xè eà fonte dea tò esperiensa.

La Serenixima gavèva porti e cità so tuto l’adriatico. Come mai che i xè ricorda ancora el benessere del periodo de colonixaziòn comerciale dei venexiani, dàea costa dalmata, àea costa pugliese e sule isole greche? Parchè i veneti dove che i riva porta sempre civiltà e bòn senso. Forse insegnare un poco de veneto dove che iérimo de casa qualche secolo fà, podarìa éssare nà nova via de scambio comerciale e de istrussiòn.
Ma adexo le reti comerciali maritime dèa repubblica de Venexia, xèe ative o nò. Serchemo de capire stì paxagi storico commerciali co’ qualche amigo esperto de storia  nei nostri pròximi giri in piàssa.

Venexiani gran signori, padovani gran dotori, vicentini magna gati, veronesi tuti mati…co rovigo no me intrigo, ma manca belunesi e trevisani, parchè? Le cità al tempo del proverbio no jèra ancora abastànsa grandi? Pòl exare. Fato stà che i belunesi no xè più montanari e i trevisani da emigranti in tel mondo i xè diventai magna-radicio e no nel senso che i se nutre del nobie vegetae , ma che i xè deventà “snob” dai ani ’80 in poi, coi ghà scomissià a fare quatro schei. In realtà tuti i veneti da chél periodo xè deventà ca…i (snob). Nei ultimi ani ghèmo fàto nà inversiòn de rota, ripensando al’umiltà dei nostri veci e ‘ndemo orgogliosi de far parte de tanta nobiltà de spirito e de lavoro. Forse el veneto “si ssior” del cinema dei ani ’50 scomissia avere eà xo rivincita e no xè vergognemo pì de l’acento veneto. Ièra ora.